Մարտի 1-ին միջազգային հանրությունը նշում է Քաղաքացիական պաշտպանության համաշխարհային օրը: Օրվա առթիվ «Հրազդանի էներգետիկ կազմակերպություն (ՀրազՋԷԿ)» բաց բաժնետիրական ընկերությունում սույն թվականի մարտի 6-ին անցկացվեց քաղպաշտպանության համաշխարհային միջազգային օրվան նվիրված ամենամյա միջոցառում-դասընթաց: Միջոցառում–դասընթացի ընթացքում Ընկերության անվտանգության և վերահսկողության բաժնի քաղաքացիական պաշտպանության տեսուչ Վաղինակ Հարությունյանը ներկայացրեց քաղաքացիական պաշտպանության ստեղծման պատմությունը և քաղաքացիական պաշտպանության հիմնական միջոցառումները։

Մասնավորապես, օդային հարձակման ժամանակ  «Օդային տագնապ» ազդարարման ազդանշանի դեպքում գնահատվեց Ընկերության աշխատակիցների գիտելիքները հետևյալ գործողությունների վերաբերյալ.

• Արտադրական տարածքներում` դադարեցնելու բոլոր տեսակի աշխատանքները, անջատելու արտադրական և տեխնոլոգիական բոլոր սարքավորումները, գազամատակարարումն ու էլեկտրասնուցումը, իջեցնելու սարքվորումներում օդի, գազի, ջրի, թթվածնի և այլ նյութերի բարձր ճնշումը, որից հետո` պատսպարվելու թաքստոցում:
• Արտադրության և այլ տեխնոլոգիական գործընթացների պայմաններով սահմանված աշխատանքների դադարեցման անհնարինության դեպքում` տեխնոլոգիական գծերը, վառարանները, տուրբինները բերելու անվտանգ աշխատակարգի և պատսպարվելու թաքստոցում։
• Ընկերությունում և հասարակական շենք-շինություններում գտնվելու դեպքում ուշադիր և հանգիստ լսելու համապատասխան հրահանգը մոտակա թաքստոցների տեղակայման և դրանց հասնելու կարճ երթուղու մասին, արագ` առանց խուճապի, շարժվելու նշված երթուղով և պատսպարվելու թաքստոցում:

Միջոցառում-դասընթացը  կազմակերպել էր քաղպաշտպանության շտաբը, որին ներկա էին Ընկերության  վարչության,  արտադրամասերի և  ՀՀ ՆԳՆ փրկարար ծառայության Կոտայքի մարզային վարչության «ՀրազՋԷԿ» ԲԲԸ-ի փրկարար ջոկատի   աշխատակիցները: Միջոցառում-դասընթացն անցավ արդյունավետ և ուսումնական մթնոլորտում։